EXWLA E TOGUN NA LE XWLA KƆDO EFI KPƆTƆƐ YE
EFI ƉEKEKPE NA MI LE LE ƐGBƐƆ MƐ Ɔ
MI LE EGBE DO NU NA MI EYƐ MIA WEZƆN
Mi le ɔwu yiya egbedo na mi do ba miye nɔxwe kena le jra nu miye ɔnɔnugbe kena le nyi nu Xwlagbe ɔ mɛ. Ɖo mi nywɛn nywnɛɖe be ɛmɛ ti un kpe wu a yi le mi si o eyɛ ɛmɛ bu ti un ma ba nɛn ɔŋunkɔ sisɔn ɖo miye tɛn xwe o, exiɔn wu tu wɛ mi le mɔ nu kpikpɔn xiɔ na nu mi. Mi kpɔn jijɔ ɛ na mia do le wa nu esa ɖiɖi xiɔ eyɛ mia nywɛn be mi nɔ ɖu le awan xiɔ ji. Kɔdo miye ɔlɔviye mi ba Exwla e awan xiɔ ji eyɛ mia ɖo kanɖe ji kɔdo mi be enu tɛtɛ xɛn ɔ a nyi wiwa.
MIA WEZƆN LE XWLAGBENYƆ E ƆXWE MƐ
Xwlagbenyɔ́ nyi ehabibɔ ɖe kena nɔ́ kpe ɔŋukusi do exwlato ɔ e ɔŋukɔnsisɔn wu ebo le ekancica mɛ kɔdo ezan waxwe ɔhɔlu ma ɖo ɔlɔ le emɛ Wycliffe Benin do zɔn Mawu e ɛwɛn nywɛn jijla lè miye ɔnɔnugbe na lé nyi nu xwlagbe ɔ mɛ. Xwlato nyi enu jɔcɔ kena ɛmɛ ye nɔ́ ba kpɔn. E gɔ nyi awanzan ɖe kena ji ɛmɛ ye nɔ́ ba ɖu Nɔvica e xwe le ɔ. Xwlagbenyɔ́ lé na nu mi emɔ enukpikpɔn adodwe kena á ɖe xlɛ mi naɖe na ye jla Mawu xo ɔ ɖo bɛ lé ganhemɛna yɔvo Mawuxo jlatɔ ye ba Benɛ e awanzan kena ye nɔ yɔ be Danxomɛ ɔ ji le Agwɛ le exwe ɔkɔ́n lokpo ɔlɔfa atitɔ gbanvɔ atɔn (1835) do ba jɛ egbe ɔ, na á do ɖe enu gbogbo ye na Mawuxo ɔ wa lè xwlato na nyi yɔhwe e awanzan ji ɔ xlɛ.
