NƆNVICA

Nɔnvica nyi enu wiwa kena nɔ na Exwla kɔdo Xwela ye  na nyi kansimɛ le Benɛ to ɔ etofɔligbe, na ya do ɖu nɔvi wiwa exwe. Vɔ keŋu gbɔxwe e nyi ehabibɔ kena un nɔ do ɔjɔ o, eyɛ Adolphe GNANSOUNOU AKPA wɛ ɖo e le exwe ɔkɔn lokpo ɔlɔfa acɛnɛ ewui vɔ lokpo (1921). Exwe sia exwe ɔ, ye nɔ ɖu azan xiɔn le Exwla e toxo mɛ le Pantekotu e azan ji eyɛ le exwe ɔkɔn lokpo ɔlɔfa acɛnɛ ewui vɔ ɔtɔn (1923) wɛ ye ɖu azan xiɔn tantin. E godo ɔ, Nɔnvica ba lɛ zun exwe na ɛmɛ susu nɔ ɖu ɔ ɖo enɔn dɔn ɛgbɛtɔ gbagbagba le Benɛ to mɛ kɔdo eto godo tɔye do nɔ ba. 
Le Pantekotu e azan gbe ɔ, Exwla kɔdo Xwela evi nusun kɔdo nyɔnuye na le Benɛ e awanzan ji kɔdo eto godo tɔ ye ɔ nɔn ba bɔ le Xwla na ya do ɖu Nɔnvica exwe. Enu wiwa hamɛhamɛye, dinsɔn ɔji ba do enu wiwaye, ɛgbɛ dida enu wiwaye kɔdo miye eto enu xoxoye ekpikpɔnye nɔn nɔ awan le toxo ɔ mɛ eyɛ ye nɔ wa ɛkpɛ dido e cɔci gbo ɖe le Nɔnvica e gbajaji. Kena exwe ɖuɖu ɔ ba le sɔn eji ɔ, ye jɛ Nɔnvica ɖu ji le tota Kutɔnutɔn, Akɔɖehatɔn, Hulɛnutɔn ye mɛ kɔdo fi buye can.